احمد صقر : كلب الست ( رائعة احمد فؤاد نجم )

بسم الله الرحمن الرحيم

بالرغم من عشقى لأغانى ام كلثوم لكنى اعجبت جدا بقصيدة احمد فؤاد نجم كلب الست

والتى تعبر عن فساد الحكم والنفوذ اللى اتعودنا عليها

كلب الست

في الزمالك من سنين
وف حمى النيل العظيم
قصر من عصر اليمين
ملك وحده من الحريم

صيتها اكتر من الآذان
يسمعوه المسلمين
والتتر
والتركمان
والهنود
والمنبوذين
ست فاقت ع الرجال
ف المقام والاحترام
صيت وشهره وتل مال
يعني ف غايه التمام

قصره يعني هي كلمه
ليها كلمه ف الحكومه
بس ربك لجل حكمه
قام حرمها م الامومه
والامومه طبع ثابت
جوه حوّا من زمان
تعمل ايه الست
جابت فوكس رومي وله ودان

فوكس دا عبقال إملتك
عندُه دسته خدّامين
يعني مش موجود ف عيلتك
شخص زيّه يااسماعين

واسماعين دا يبقى واحد
مِ الجماعه الغلبانين
اللي داخو ف المعاهد
والمدارس من سنين

حب يعمل واد فكاكه
ويمشي حبه في الزمالك
والقيامه والفتاكه
يرموا طبعا ع المهالك
عم سمعه من قيامته
حب يعمل فيها فله
بعد ما ألوظ بيجامته
اشترى حِتِه مجلَّه

قول مش بيقرا ف حكايه
من حكايات الغرام
واندماجه ف القرايه
خلا مشيه مش تمام

ع اليمين يحدف بعيد
خطوتين
وتروح شمال
لمحه فوكس من الحديد
قال دا صيد
سهل وحلال

هوب نط ف كرشه دوغري
جاب بجامته لحدِّ ديلها
اسماعين بدال مايجري
قال يارجلي
رجلي مالها

بص شاف الدم سايح
من عاليها ومن واطيها
وياللي جاي
وياللي رايح
المجلة مش لاقيها
حبَّه واتلمّوا الظنايا
اللّي همّا البوابين
والهَكايَه والرَوايه
قال لُهُمْ دا كلب مين ؟
كلب مين
ماكلب مينشي
سُمْعَهْ لبّخ حبّتين
قال له واحد منهم إمشي
اللّي جابك إِنْدُه مين
قال دا شارع ياموَاشي
للجميع
راكب وماشي

كلمه من دا
وكلمه من دا
ظاطو واتقلبت فضيحه
قول نهايته والقصد من دا
اسماعين شرب الطريحه

راحوا قسم الشرطةجمْعاً
والنيابه كفيله بيهم
واترموا ف الحجزطبعاً
لما ييجي الدور عليهم
شاف بلاوي ماتتحكيش
م الهفايا المحبوسين
قال ياعالم
ياشاويش
يانيابة..يامسؤلين

خلِّصوه بعد المناهده
جثه
من جحر الديابه
هيّ يمكن ساعه واحدة
كان في مكتب النيابة

قال له مالك ياسماعين
قال له زي البمب مالي
قال له عضَّك فوكس فين
قال له سيبني أروح لحالي
إنت شوف سي فوكس يمكن
خد تسمُّم غصب عني
الوكيل قال برضه ممكن
والشاويش قعد يغني
هيّص ياكلب الست هيّص
لك مجامك ف البوليس
بكرة تتولِّف وِزارة
للكلاب
ياخدوك رئيس

انت تسوى ف النيابه
تسعميَّة م الغلابة
طب ياريت يافوكس كِنّا
ولاتُربُطنا الجرابة

انت فين والكلب فين
انت كده يااسماعين
طب دا كلب الست يابني
وانت تطلع ابن مين

بشرى لصحاب الديول
واللّي له اربع رجول
بشرى لا سيادنا البهايم
من جمايس أو عجول
اللّي صاحبه ياجماعه
له أغاني ف الاذاعه
راح يدوس فوق الغلابه
والنيابه
بالتباعة
هيّص ياكلب الست هيّص
هيّص ياكلب الست هيّص